Autoritetet britanike kanë ndërmarrë veprime ligjore ndaj pesë shtetasve shqiptarë, të akuzuar për përfshirje në një skemë të organizuar mashtrimi me martesa fiktive. Sipas Prokurorisë së Kurorës (CPS), të dyshuarit përdornin certifikata martese të falsifikuara, të paraqitura si të lëshuara në Qipro, për të përfituar të drejtën e qëndrimit në Mbretërinë e Bashkuar përmes Skemës së Vendosjes së BE-së (EU Settlement Scheme).
Hetimet, të cilat u intensifikuan pas operacioneve të Home Office më 17 qershor në Angli dhe Uells, çuan në arrestimin e personave të përfshirë. Të pandehurit Kastriot Hoxha (31 vjeç), Sina Ervin (35 vjeç), Kadri Sinamati (28 vjeç) dhe Valdet Qoshi (40 vjeç) përballen me akuza për mashtrim dhe shkelje të ligjeve të emigracionit. Përveç këtyre, Kastriot Hoxha akuzohet edhe për posedim të lëndëve narkotike me qëllim shitjen. Ata do të paraqiten në Gjykatën e Kurorës në Sheffield më 16 korrik.
Shtetasi i pestë, Denis Hani (30 vjeç), ka pranuar fajësinë për mashtrim me deklarim të rremë dhe dy vepra të tjera penale në Gjykatën e Magjistraturës në Birkenhead. Ai pritet të marrë dënimin më 16 korrik në Gjykatën e Kurorës në Liverpool.
Prokurori i lartë i CPS, Shaun Sigamoney, deklaroi se për katër të pandehurit e tjerë vlen parimi i prezumimit të pafajësisë deri në një vendim përfundimtar të gjykatës.
Përditësime
Prokurori i Yorkshire dhe Humberside, Shaun Sigamoney, njoftoi zhvillime të reja në çështjen ndaj pesë shtetasve shqiptarë të akuzuar për martesa fiktive:
- Denis Hani pranoi fajësinë një ditë pas arrestimit më 18 qershor.
- Kastriot Hoxha përballet me akuzën shtesë të posedimit të kanabisit me qëllim shpërndarjen.