Mirlind Daku dhe Armando Broja rrezikojnë të mungojnë në ndeshjet play-off për Botërorin, të parashikuara në fund të këtij muaji.
Kur mbeten pak më shumë se dy javë nga grumbullimi i kuqezinjve, trajneri Silvinjo duhet të bëjë zgjedhje alternative për repartin e sulmit. Broja vazhdon të jetë i dëmtuar dhe nuk ka kthyer në stërvitje. Në të njëjtën situatë ndodhet edhe Daku, i cili ka pësuar dëmtim në tendinë te skuadra ruse Rubin Kazan.
Trajneri i ri i Rubin Kazan, spanjolli Frank Artiga, në prezantimin e tij para mediave, shpjegoi situatën e Dakut. Ai u pyet për mungesën e lojtarit dhe theksoi se nuk do ta aktivizojë pa rikuperim të plotë 100%, për të shmangur përsëritjen e dëmtimit me pasoja të rënda.
Artiga deklaroi: «Kur erdha këtu, po prisja me padurim mundësinë që të punoja me Dakun, por tani ai është i dëmtuar dhe kjo është një humbje e madhe. Po, skuadra është ndërtuar rreth Dakut dhe ai është e pamundur që të zëvendësohet. Është e pamundur që të zëvendësohet në çdo skuadër, është e vështirë që të gjejmë diku tjetër cilësitë e tij. Ne duam që të kalojmë më shumë kohë në gjysmëfushën e kundërshtarit dhe e gjithë skuadra e kupton që të gjithë duhet të bëjnë më të mirën për të kompensuar mungesën e Mirlindit. Një dëmtim në tendinë është mjaft specifik. Nëse përsëritet, lojtari do të jetë jashtë për një kohë shumë të gjatë dhe ne nuk duam që të rrezikojmë. Po monitorojmë rikuperimin e tij, derisa të jetë 100%. Ka data të përafërta për kthimin e tij, por jo një datë specifike».
Kjo bën të qartë se shanset për kthimin e shpejtë të Dakut në fushë janë të ulëta, duke komplikuar planet e Silvinjos për ndeshjet vendimtare.