Sulmuesi i Kombëtares Shqiptare, Mirlind Daku, ka vazhduar formën e tij të shkëlqyer në fillim të kampionatit rus, duke realizuar në fitoren e Rubin Kazanit ndaj Akron Togliatti me rezultatin 1-2. Goli i Dakut erdhi në minutën e 19-të të takimit, ku ai shfrytëzoi një top të humbur brenda zonës për të dyfishuar epërsinë e ekipit të tij. Kjo është ndeshja e dytë radhazi ku futbollisti gjilanas arrin të shënojë, pas golit të realizuar në javën e parë kundër Krasnodarit.
Në këtë sfidë, pjesë e formacionit titullar të Rubin Kazanit ishte edhe futbollisti tjetër shqiptar, Nazmi Gripshi, i cili e nisi ndeshjen nga minuta e parë, për t'u zëvendësuar më pas gjatë pjesës së dytë. Goli i parë për miqtë u shënua nga Arroyo në minutën e 15-të, ndërsa vendasit e Akron Togliatti ngushtuan diferencën në minutën e 30-të.
Pavarësisht raportimeve për një interesim të mundshëm nga Spartak Moska, ekip i cili thuhet se është i gatshëm të paguajë klauzolën prej 11 milionë eurosh për sigurimin e shërbimeve të tij, Mirlind Daku ka vijuar angazhimin e rregullt me skuadrën aktuale. Pjesëmarrja e tij në fushë dhe goli i shënuar konfirmojnë përqendrimin e lojtarit te objektivat e klubit të Rubin Kazanit për këtë sezon të ri në elitën e futbollit rus.
Përditësime
Rubin Kazani dhe Spartak Moska kanë arritur një marrëveshje për transferimin e Mirlind Dakut. Sulmuesi shqiptar pritet të nënshkruajë një kontratë me pagë rekord për kampionatin rus. Pavarësisht dakordësisë mes klubeve, tifozët e Rubin Kazanit kanë kërkuar publikisht qëndrimin e lojtarit, duke e mbështetur atë vazhdimisht gjatë ndeshjeve të fundit.