Sezoni i ri në Premier Ligën ruse ka nisur në mënyrë pozitive për futbollistët shqiptarë, të cilët kanë lënë gjurmë menjëherë në ndeshjet e javës së parë.
Sulmuesi i Kombëtares shqiptare, Mirlind Daku, ishte protagonist për Rubin Kazanin në sfidën përballë Krasnodarit. Ai gjeti rrugën e rrjetës në minutën e 12-të, pasi përfitoi nga një asist i portierit dhe finalizoi me sukses pas një depërtimi mes dy mbrojtësve kundërshtarë. Pavarësisht golit të tij, Rubin Kazani nuk arriti të siguronte pikë, pasi ndeshja përfundoi me fitoren e Krasnodarit me rezultatin 1-3. Në këtë takim, për skuadrën e Rubin Kazanit u aktivizuan si titullarë edhe Nazmi Gripshi dhe Veldin Hoxha, ndërsa Dardan Shabanhaxhaj mungoi.
Nga ana tjetër, një debutim mbresëlënës përjetoi Erald Maksuti me fanellën e Akhmat Groznit. Ish-sulmuesi i Flamurtarit, i transferuar këtë verë në Rusi, u hodh në fushë në minutën e 78-të të sfidës kundër Lokomotivës së Moskës. Vetëm pesë minuta pas hyrjes në lojë, 22-vjeçari arriti të realizonte golin e barazimit 1-1, duke i siguruar ekipit të tij një pikë të vlefshme në këtë përballje. Ky gol shënon një nisje premtuese për Maksutin në elitën e futbollit rus, pas paraqitjeve të suksesshme që pati gjatë sezonit të kaluar.