Burrat shqiptarë renditen të parët në Europë për dëshirën e tyre për të vazhduar punën në një moshë më të thyer krahasuar me vendet e tjera. Sipas raportit të Anketës Europiane të Kushteve të Punës (EWCS 2024), ata synojnë të tërhiqen nga tregu i punës në moshën 67.4 vjeç. Kjo shifër tejkalon shtete me mirëqenie të lartë, si Danimarka (66.5 vjeç), Norvegjia (65.9 vjeç), Suedia (65.9 vjeç) dhe Holanda (65.5 vjeç).
Në rajon, kontrasti mbetet i ndjeshëm:
- Kosova: 65 vjeç
- Serbia: 63.7 vjeç
- Maqedonia e Veriut: 62.8 vjeç
- Bosnjë-Hercegovina: 62.5 vjeç
- Mali i Zi: 61.7 vjeç
Raporti nënvizon se ky qëndrim nuk buron nga preferenca për jetën aktive, por nga domosdoshmëria ekonomike për shkak të pensioneve të pamjaftueshme.
Të dhënat nga Instituti i Sigurimeve Shoqërore (ISSH) tregojnë se 55% e 641,085 pensionistëve në vend trajtohen me pension të pjesshëm, pasi nuk plotësojnë vitet e sigurimit. Vlera mesatare e pensionit aktual është 20,000 lekë, ndërsa pagesa e pjesshme është 13,500 lekë. Gjithashtu, sipas të dhënave të INSTAT, vërehet një shtim i numrit të pensionistëve që vazhdojnë të punojnë, fenomen që lidhet me emigrimin e të rinjve. Edhe gratë shqiptare shfaqin tendenca të ngjashme, duke dëshiruar të punojnë deri në moshën 63.5 vjeç.