Eugen Cakolli, hulumtues në Institutin Demokratik të Kosovës (KDI), ka shkruar në Facebook se institucionet e Kosovës duhet të sigurohen që përgatitja për zgjedhje të mundshme të mos vihet në pikëpyetje. Kjo deklaratë vjen në ditën e fundit të afatit kushtetues për zgjedhjen e Presidentit të ri, kur mbetet e paqartë nëse do të arrihet zgjidhje apo vendi do të shkojë në zgjedhje të reja.
Cakolli thekson nevojën për qartësi në përbërjen e Komisionit Qendror të Zgjedhjeve (KQZ), e cila lidhet me ciklin zgjedhor dhe duhet të reflektojë rezultatin e zgjedhjeve të fundit parlamentare. Pas certifikimit të rezultateve më 9 shkurt, ligji parashikon një procedurë deri në 42 ditë për emërimin e anëtarëve të rinj sipas përbërjes së re të Kuvendit.
Sipas procedurës, Presidentja ka pasur 30 ditë afat – që skadon më 11 mars – për t’u kërkuar partive parlamentare nominimet. Këto parti kanë një javë për të dorëzuar emrat, ndërsa emërimi bëhet brenda pesë ditëve nga Presidentja. Megjithatë, grupet parlamentare me të drejtë propozimi ekzistojnë vetëm për sa kohë që Kuvendi ka mandat dhe nuk janë shpallur zgjedhjet e reja.
Me skenarin e zgjedhjeve të reja që duket gjithnjë e më i mundshëm, Cakolli vë në dukje se afati ligjor për emërimin e anëtarëve të rinj të KQZ-së është tashmë jashtëzakonisht i ngushtë. Kjo situatë bëhet më problematike sepse ligji aktual nuk parashikon vazhdim automatik të mandatit të përbërjes ekzistuese të KQZ-së deri në emërimin e të resë, ndryshe nga ligji i vjetër.
Sipas tij, institucioni që organizon zgjedhjet duhet të jetë jo vetëm funksional dhe me mandat, por edhe i pakontestueshëm, për të shmangur debatet për legjitimitetin gjatë procesit zgjedhor.