Organizata Demokracia në Veprim (DnV) ka kërkuar përmbylljen pa vonesë të procedurës për emërimin e përbërjes së re të Komisionit Qendror të Zgjedhjeve (KQZ).
Sipas DnV-së, ky proces bëhet i domosdoshëm në kontekstin e zhvillimeve që pritet të çojnë drejt një procesi të ri zgjedhor. Afati ligjor për përmbylljen e kësaj procedure është 11 marsi, ndërsa legjislacioni aktual nuk parashikon më vazhdimin automatik të mandatit të përbërjes ekzistuese deri në emërimin e asaj të re, ndryshe nga ligji i mëparshëm.
DnV ka ndjekur nga afër hapat institucionalë që nga certifikimi i rezultateve të zgjedhjeve parlamentare të 9 shkurtit. Pas këtij certifikimi, Presidentja Vjosa Osmani u kërkon subjekteve parlamentare nominimet për anëtarët e KQZ-së. Këto subjekte kanë afat të caktuar për dorëzimin e propozimeve, pas së cilës presidentja kryen emërimin.
Në një njoftim zyrtar, DnV i bën thirrje Presidentes së vendit dhe subjektve parlamentare të ndërmarrin dhe përmbyllin pa vonesë hapat e nevojshëm për nominimin dhe emërimin e anëtarëve të rinj. "Çdo proces i mundshëm zgjedhor duhet ta gjejë Kosovën me institucione zgjedhore të konsoliduara, funksionale dhe me mandat të qartë ligjor, në mënyrë që administrimi i zgjedhjeve të mos shoqërohet me dilema për legjitimitetin e tij", thuhet në reagimin e organizatës.