Eugen Cakolli nga KDI mirëpriti vendimin e Gjykatës Kushtetuese që shpalli të papranueshme kërkesën e presidentes Osmani lidhur me përbërjen e Komisionit Qendror të Zgjedhjeve (KQZ).
Sipas Cakollit, ky vendim ishte i pritur dhe bazohet në rastet e kaluara. Me këtë, tema e përbërjes së KQZ-së bëhet ndër më të trajtuarat nga Gjykata dhe nuk lë hapësirë për dilema të reja artificiale.
Ai vlerësoi se ky vendim mbyll tentativën për ta kthyer çështjen në dilemë kushtetuese. Rregullat ekzistuese, të zbatuara në situata identike më parë, duhet të zbatohen njësoj. Ideja që KQZ duhet të pasqyrojë raportin e mandateve sikur Kuvendi është e gabuar dhe në shpërputhje me dizajnin kushtetues të këtij institucioni.
Cakolli sqaroi se KQZ nuk është miniaturë e Kuvendit që riprodhon raportin e forcave politike. Përbërja e saj prej 11 anëtarësh nuk është ndërtuar për të reflektuar dominimin e një subjekti, por për të ruajtur ekuilibrin që siguron besueshmërinë e procesit zgjedhor.
Ai u bën thirrje presidentes që ta përmbyllë sa më parë kompletimin e përbërjes duke emëruar anëtarin e mbetur nga radhët e subjektit tjetër politik me të drejtë nominimi.