Eugen Cakolli nga Instituti Demokratik i Kosovës (KDI) ka reaguar ndaj vendimit për vazhdimin e seancës konstituive të Kuvendit të Kosovës më 8 gusht, duke e cilësuar këtë veprim si shkelje të hapur dhe cenim të drejtpërdrejtë të rendit kushtetues.
Sipas Cakollit, kryesuesi i seancës, Avni Dehari, kishte detyrimin ligjor që ta thërriste vazhdimin e seancës gjatë ditës së sotme, në mënyrë që procesi të përmbyllej brenda afatit kushtetues, deri në orën 23:59. Ai theksoi se afati 48-orësh i pauzës është kufi procedural që duhet të zbatohet vetëm brenda afateve kushtetuese.
Akuzat ndaj LVV-së dhe Kryesuesit
Në reagimin e tij, Cakolli ngriti shqetësimin se Lëvizja Vetëvendosje (LVV), përmes mosushtrimit të së drejtës për propozimin e kandidatit për kryetar të Kuvendit brenda afatit 30-ditor, së bashku me vendimin e Deharit për caktimin e seancës pas afatit, u kanë pamundësuar deputetëve ushtrimin e detyrimeve të tyre kushtetuese. Sipas tij, ky veprim përbën shkelje procedurale dhe moszbatim të aktgjykimeve të mëparshme të Gjykatës Kushtetuese.
Për këtë arsye, Cakolli u ka bërë thirrje së paku dhjetë deputetëve që, menjëherë pas mesnatës, t'i drejtohen Gjykatës Kushtetuese për të kontestuar këtë vendim. Ai kërkon nga kjo Gjykatë vendosjen e një mase të përkohshme që do të pezullonte mbajtjen e seancës së planifikuar për të shtunën në orën 11:00.
Përditësime
Partia Demokratike e Kosovës e cilësoi vendimin e kryesuesit Avni Dehari si precedent të rrezikshëm për rendin kushtetues dhe shtetin ligjor. Subjekti opozitar ende nuk ka konfirmuar pjesëmarrjen e 22 deputetëve të saj në seancën e së shtunës, ku rendi i ditës përfshin zgjedhjen e Kryetarit dhe nënkryetarëve të Kuvendit të Kosovës. Ndërkohë, takimi midis kryeministrit Albin Kurti dhe kryetarit të LDK-së, Lumir Abdixhiku, përfundoi pa marrëveshje politike.