Presidenti i CFR Cluj, Ioan Varga, ka sqaruar pozicionin e klubit në lidhje me të ardhmen e futbollistit kosovar Meriton Korenica. Në një deklaratë për gazetën rumune "Gazeta Sporturilor", Varga theksoi se lojtari nuk është në shitje, përveç rasteve kur klubi merr një ofertë financiare prej 2 milionë eurosh.
Ndërsa raportimet e mediave kanë përmendur një interesim të mundshëm nga skuadra italiane e Serie A, Monza, si dhe nga klubet vendase FCSB dhe Rapidi i Bukureshtit, drejtuesi i klubit rumun bëri të ditur se deri më tani nuk ka pasur asnjë kontakt zyrtar apo ofertë konkrete për transferimin e lojtarit. Sipas Vargës, Korenica konsiderohet një ndër futbollistët më të rëndësishëm në kampionatin rumun.
Meriton Korenica iu bashkua CFR Cluj në vitin 2024. Sulmuesi i krahut të majtë, i cili është pjesë e kombëtares së Kosovës, ishte një nga lojtarët kryesorë të ekipit gjatë edicionit të kaluar. Aktiualisht, lojtari ka edhe një vit të mbetur në kontratën e tij me klubin rumun.