Futbollisti i Kosovës, Meriton Korenica, ka dhënë një kontribut të rëndësishëm në fitoren e skuadrës së tij, CFR Cluj, në ndeshjen e kthimit të vlefshme për kualifikimet e Ligës së Konferencës. Skuadra rumune mposhti ekipin armen Alashkert me rezultatin 3:0, duke siguruar kalimin në fazën tjetër të këtij kompeticioni.
Goli i Meriton Korenicës erdhi në minutën e 45-të të pjesës së parë. Aksioni nisi nga lojtari Drazic, i cili tentoi të shënonte me një parabolë, por topi përfundoi te sulmuesi kosovar. Korenica u gjend në vendin e duhur dhe dërgoi topin në rrjetën e zbrazur, duke dyfishuar epërsinë për CFR Cluj. Futbollisti qëndroi në fushën e lojës deri në minutën e 71-të.
Pas barazimit 1:1 në ndeshjen e parë, CFR Cluj arriti një rezultat të përgjithshëm prej 4:1, duke vazhduar rrugëtimin në raundin e tretë kualifikues të Ligës së Konferencës.