Çiklisti australian Bob Montgomery është ndarë nga jeta në moshën 82-vjeçare, pak kohë pas përfundimit të një sfide të gjatë bamirëse nëpër Australi. Udhëtimi, i pagëzuar si “Një Udhëtim i Fundit” (One Last Ride), nisi nga qyteti i Broome në Australinë Perëndimore dhe zgjati gjashtë javë, për të përfunduar në Bowral, në jugperëndim të Sidneit.
Së bashku me nipin e tij 18-vjeçar, Tom Malcolm, ai arriti të mbledhë më shumë se 105,000 dollarë australianë për organizatën MND NSW. Ky mision ishte fushata e gjashtë e këtij lloji e ndërmarrë nga Montgomery, i cili kishte zgjedhur të mbështeste këtë kauzë pas humbjes së një kushëriri nga sëmundja e neuroneve motorike. Në pesë udhëtimet e mëparshme, ai kishte kontribuar me rreth 300,000 dollarë australianë për të njëjtin qëllim.
Sipas njoftimit të familjes, vdekja e 82-vjeçarit ndodhi në mënyrë të papritur menjëherë pas festimeve për përmbylljen me sukses të itinerarit. Montgomery, i cili kishte qenë i martuar prej 59 vitesh me bashkëshorten e tij, Jenny, pësoi një problem të papritur shëndetësor pas kthimit nga udhëtimi.
Drejtori ekzekutiv i organizatës MND NSW, Liam O’Meara, e vlerësoi kontributin e tij si mbështetës të palodhur, duke e cilësuar atë si një mik të çmuar të kauzës për pacientët. Historia e tij është kthyer në një simbol të përkushtimit dhe vullnetit për të ndihmuar të tjerët, edhe në moshë të thyer.