Një ngjarje tragjike ka ndodhur gjatë etapës së tetë të garës prestigjioze të çiklizmit, Volta a Portugal, ku ka humbur jetën çiklisti 19-vjeçar britanik, Finlay Tarling. I riu ishte pjesë e NSN Development Team dhe njihej si një talent premtues i çiklizmit uellsian, i specializuar në garat me kohëmatës.
Sipas transmetuesit publik RTP dhe mediave të tjera, aksidenti ndodhi kur çiklisti u godit nga një automjet që nuk ishte pjesë e garës dhe po lëvizte në drejtim të kundërt. Raportime nga Correio da Manha saktësojnë se përplasja ndodhi në zonën mes Melgaco dhe Fafe, pasi drejtuesi i mjetit mendoi gabimisht se grupi i çiklistëve kishte kaluar. Pavarësisht ndërhyrjes së shpejtë të ekipeve mjekësore, Tarling ndërroi jetë si pasojë e plagëve të rënda.
Pas aksidentit, organizatorët e Volta a Portugal dhe Federata Portugeze e Çiklizmit njoftuan zyrtarisht vdekjen e sportistit, duke shprehur ngushëllimet për familjen dhe bashkëlojtarët. Në shenjë respekti, gara u pezullua dhe ceremonia e podiumit në Fafe u anulua. Për këtë ngjarje reaguan autoritetet portugeze, përfshirë kryeministrin Luis Montenegro, i cili shprehu tronditjen dhe ngushëllimet për vdekjen e parakohshme të të riut.
Përditësime
Autoritetet portugeze transportuan trupin e pajetë të Finlay Tarling në Institutin e Mjekësisë Ligjore në Viana do Castelo për ekspertizë. Tarling, një talent në ngjitje dhe anëtar i NSN Development Team, fitoi së fundmi vendin e tretë në garën e kronometrit për kategorinë U23 në Kampionatin Kombëtar Britanik. Ai ishte vëllai i çiklistit profesionist Josh Tarling.