Vlora Çitaku, nënkryetare e Kuvendit të Kosovës nga radhët e PDK-së, në një konferencë për media ka kërkuar nga Feride Rushiti të tërhiqet nga kandidatura për presidente.
Ajo ka deklaruar se Rushiti të mos huazojë emrin e saj për interesat ditore të Albin Kurtit. Çitaku ka theksuar se Kushtetuta dhe ligjet nuk mund të interpretohen sipas interesave politike dhe se veprimet e tilla rrezikojnë themelet e shtetit. Ajo ka akuzuar qeverinë për tejkalim të kufijve dhe dhunë politike në Kuvend, duke bërë thirrje për reagim opozitar dhe qytetar për mbrojtjen e rendit kushtetues.
Opozita do të ndërmarrë të gjitha veprimet e nevojshme për të ndaluar, sipas saj, shkeljet e Kushtetutës nga pushteti. Çitaku ka cilësuar kandidaturën si maskaradë politike dhe antikushtetuese, duke shprehur keqardhje për përfshirjen e Rushitit, emrin e së cilës e çmon për angazhimin në shoqërinë civile.
Nga ana tjetër, kryeministri Albin Kurti në një konferencë për media ka thënë se ende ekziston mundësia që Feride Rushiti të jetë presidente. Ai e ka falënderuar atë për gatishmërinë për ta nxjerrë vendin nga ngërçi presidencial dhe për të shmangur zgjedhjet e reja. Kurti ka akuzuar kryetarët e partive opozitare se kanë humbur arsyen dhe kanë vendosur inat ndaj popullit.
Kurti ka kritikuar mungesën e mbështetjes nga opozita për Rushitin, duke përmendur se deri dje deputetë opozitarë, si Hykmete Bajrami nga LDK dhe vetë Vlora Çitaku, kishin postuar në rrjete sociale për nderimet e saj ndërkombëtare. Ai ka konsideruar turpshme refuzimin e PDK-së ndaj ofertës për kryeparlamentar dhe kërkesën për tërheqjen e Rushitit.