Çmimi i vajit ekstra të virgjër të ullirit në pikat e grumbullimit në Belsh dhe Elbasan ka zbritur në 500 lekë për litër, nga deri në 700 lekë vitin e kaluar. Në Lushnjë, çmimi luhatet nga 500 deri në 600 lekë për litër. Të dhënat u raportuan më 9 nëntor nga Politiko dhe NOA. Sipas Politiko-s, rënia krahasuar me vitin e kaluar është 20 deri në 40 për qind.
Rritja e prodhimit të ullirit këtë vit, kërkesa e ulët në tregun vendas dhe vështirësitë për eksport po ushtrojnë trysni mbi çmimin dhe po rrezikojnë ndalimin e grumbullimit. Politiko thekson se në disa zona fermerët po refuzojnë ta shesin vajin me çmimet aktuale dhe po e mbajnë në shtëpi.
Aldo Jolla, përpunues, grumbullues dhe eksportues në zonën e Belshit, tha për Monitor se grosistët italianë kërkojnë vaj rifuxho, të paambalazhuar për eksport, me rreth 2,5 euro për litër. Sipas tij, ky çmim e bën të pamundur grumbullimin, ndërsa fuqia blerëse në tregun vendas ka rënë. Jolla tha se deri në atë moment nuk kishte grumbulluar asnjë sasi vaji dhe se, nëse çmimi i eksportit mbetet në këto nivele, nuk e shihte të leverdishëm grumbullimin deri në përfundim të vjeljes. Ai shtoi se disa fermerë po e kthejnë prodhimin në shtëpi, në vend që ta shesin.
Agron Çakalli, drejtues i Federatës Bujqësore të Elbasanit, tha për Monitor se prodhimi i këtij viti është i mbarë dhe se rritja e tij po ndikon në uljen e çmimit të grumbullimit. Sipas tij, prodhimi më i lartë lidhet me natyrën ciklike të ullirit; vitin e kaluar çmimi ishte më i lartë për shkak të prodhimit më të ulët.
Çakalli tha se kostot e prodhimit, përfshirë shërbimet dhe pagesat për vjelësit, po bëjnë që shumë fermerë të refuzojnë shitjen me çmimet aktuale. Ai paralajmëroi se situata mund t’i demotivojë fermerët të kujdesen për ullishtet vitin e ardhshëm dhe kërkoi ndërhyrje shtetërore përmes subvencionimit të çmimit, veçanërisht për vajin ekstra të virgjër. Sipas tij, pa ndërhyrje, ullishtet rrezikojnë të lihen pas dore.