Klubi italian Como ka zyrtarizuar marrëveshjen me Real Madrid për transferimin përfundimtar të mesfushorit argjentinas Nico Paz. Ky zhvillim vjen pas negociatave intensive, ku një rol kyç ka luajtur këmbëngulja e trajnerit Cesc Fàbregas dhe dëshira e vetë futbollistit për të vazhduar karrierën në Itali.
Sipas ekspertit të merkatos, Fabrizio Romano, vlera e operacionit vlerësohet rreth 60 milionë eurove. Pavarësisht transferimit të përhershëm, Real Madrid ka futur në kontratë një klauzolë riblerjeje, e cila i jep të drejtën klubit madrilen të mbajë kontrollin mbi të ardhmen e 21-vjeçarit. Marrëveshja u finalizua pasi lojtari shprehu dëshirën për të qëndruar te Como, duke preferuar minutazhin e garantuar mbi mundësinë e rikthimit te madrilenët, ku ekzistonin dyshime për kohën e tij të rregullt të lojës nën drejtimin e Jose Mourinho.
Nico Paz, i cili është aktualisht pjesë e përfaqësueses së Argjentinës për Kupën e Botës, ishte një prej objektivave të merkatos edhe për Interin, por klubi milanez nuk arriti ta finalizonte transferimin. Qëndrimi i tij te Como konsiderohet një fitore për projektin sportiv të klubit, i cili sezonin e kaluar siguroi kualifikimin në Ligën e Kampionëve.