Profesori amerikan Daniel Serwer, në një intervistë për Ekonomia Online, ka analizuar gjendjen politike në Kosovë, duke e cilësuar vitin e fundit si një periudhë me sfida të mëdha për stabilitetin institucional. Sipas tij, pamundësia për të zgjedhur presidentin dhe vonesat në formimin e qeverisë kanë dëmtuar imazhin e qëndrueshmërisë së shtetit.
Serwer shpjegoi se vështirësitë rrjedhin nga natyra e sistemit parlamentar, ku qeveria dhe kreu i shtetit varen drejtpërdrejt nga vota në Parlament. Pavarësisht këtyre sfidave, ai shprehu bindjen se formimi i institucioneve është i realizueshëm nëse subjektet politike angazhohen për të gjetur një gjuhë të përbashkët.
“Njerëzit do të duhet të qeverisin së bashku, ndoshta pak më shumë se në të kaluarën, por kjo është e realizueshme dhe shpresoj që të bëhet”, theksoi ai. Serwer u kërkoi politikanëve të përqendrohen te detyra kryesore: të fillojnë punën dhe të formojnë qeverinë.
Në lidhje me marrëdhëniet ndërkombëtare, profesori amerikan nënvizoi se miqësia e Kosovës me Shtetet e Bashkuara të Amerikës mbetet e pandryshuar, pavarësisht ndryshimeve të qeverive ndër vite.