Ambasadori i Suedisë në Kosovë, Jonas Westerlund, u ka bërë thirrje partive politike në vend që të lënë mënjanë ndasitë dhe të arrijnë një kompromis për formimin e institucioneve të reja. Në një intervistë për Ekonomia Online, ambasadori vlerësoi se ndonëse vështirësitë në krijimin e koalicioneve qeverisëse janë shndërruar në një fenomen global, Kosova është më e cenueshme për shkak të statusit të saj si shtet i ri.
Sipas Westerlund, zvarritja e procesit pas zgjedhjeve të 7 qershorit po ndikon negativisht në ekonominë e vendit dhe në krijimin e vendeve të reja të punës. Ai nënvizoi se në traditën evropiane, kompromisi nuk shihet si dobësi, por si tregues i forcës politike.
Ambasadori njoftoi se pritet certifikimi i rezultateve zgjedhore, pas të cilit kryeministri në detyrë, Albin Kurti, pritet të nisë konsultimet zyrtare. Westerlund theksoi se funksionimi i institucioneve dhe përshpejtimi i reformave janë parakushte thelbësore për rrugëtimin e Kosovës drejt Bashkimit Evropian dhe, në të ardhmen, drejt anëtarësimit në NATO.