Profesori amerikan Edward P. Joseph ka vlerësuar se ngërçi aktual politik në Kosovë po dëmton zhvillimin demokratik të vendit. Në një intervistë të realizuar së fundmi, ai ka theksuar se përgjegjësia për zhbllokimin e situatës u takon të gjithë udhëheqësve politikë.
Sipas Joseph, kryeministri në detyrë, Albin Kurti, mban përgjegjësinë kryesore, pasi kontrollon shumicën e votave në Kuvendin e Kosovës. Megjithatë, eksperti amerikan nënvizoi se barra e përgjegjësisë është e përbashkët. Ai u bëri thirrje qytetarëve që t’i ndëshkojnë përmes votës të gjithë liderët politikë që dështojnë të gjejnë një konsensus, pasi kjo situatë po e dëmton vendin.
Duke bërë dallimin mes stabilitetit shtetëror dhe zhvillimit demokratik, Joseph vlerësoi se Republika e Kosovës mbetet një shtet i qëndrueshëm. Megjithatë, ai e përshkroi ngërçin aktual si një shembull negativ për demokracinë, duke theksuar se ai mbështet fuqishëm rrugën e vendit drejt anëtarësimit në NATO.