Edward P. Joseph, ekspert i çështjeve të Ballkanit Perëndimor, komentoi zhvillimet në raportet ndërmjet Kosovës dhe Shteteve të Bashkuara të Amerikës në emisionin Info Magazine të Klan Kosova më 8 mars 2026.
Ai u ndal te rëndësia e përfshirjes së Kosovës në Bordin e Paqes, duke e cilësuar si zhvillim të rëndësishëm në dialogun strategjik me ShBA.
Sipas Joseph, kjo përbën një ftesë tejet të rëndësishme. «Mendoj se kjo është një ftesë tejet e rëndësishme për Kosovën, të ftohesh në Bordin e Paqes. Fakti që presidentja Vjosa Osmani ka qenë në themelimin e kësaj organizate në Davos dhe në takimin e parë në Uashington, është shumë e rëndësishme, është tregues i qartë se Kosova po ndërton raporte me Administratën Trump 2», tha ai.
Joseph theksoi se kjo është veçanërisht domethënëse për shkak të suspendimit të dialogut strategjik nga ShBA me Kosovën në shtatorin e kaluar. «Kjo që ndodhi është e kundërta e saj, është e qartë se presidentja Osmani po e përfaqëson Kosovën në një formë tjetër të dialogut strategjik dhe kjo ka rëndësi», u shpreh ai.