Profesori i Universitetit Johns Hopkins, Daniel Serwer, në një deklaratë për Abc News Albania, ka vlerësuar se mbajtja në burg e ish-krerëve të Ushtrisë Çlirimtare të Kosovës (UÇK) për një periudhë prej pesë vitesh pa një vendim përfundimtar është e padrejtë.
Serwer shprehu rezerva të thella mbi procesin gjyqësor, duke theksuar se akuzat për trafik organesh, të cilat shërbyen si nxitje për themelimin e këtij institucioni, ishin të rreme. Ai pranoi se ka mbështetur krijimin e Gjykatës Speciale me besimin se ato akuza nuk do të qëndronin, duke shtuar se sot e konsideron atë mbështetje si gabim. Sipas tij, tribunali ka shpenzuar shuma të mëdha financiare për një proces që ngre pikëpyetje serioze mbi drejtësinë dhe drejtësinë procedurale.
Duke iu referuar përvojës së tij personale me ish-presidentin Hashim Thaçi, të cilin e ka takuar pas luftës në Uashington, Serwer u shpreh se nuk beson që Thaçi ka pasur autoritet komandues mbi UÇK-në në formën siç pretendojnë prokurorët. Ai pranoi se pas luftës kanë ndodhur ngjarje të dhunshme, përfshirë ato ndaj serbëve dhe përplasjet politike midis mbështetësve të UÇK-së dhe LDK-së, por nënvizoi se këto zhvillime nuk justifikojnë akuzat kryesore mbi të cilat u ngrit gjykata.