Profesori amerikan Daniel Serwer ka folur lidhur me procesin gjyqësor në Hagë kundër ish-krerëve të Ushtrisë Çlirimtare të Kosovës (UÇK), duke shprehur rezerva për mënyrën e funksionimit të gjykatës. Ai u shpreh se pendohet që ka mbështetur krijimin e Dhomave të Specializuara, pasi, sipas tij, mbajtja në paraburgim e të akuzuarve për një kohë të gjatë, si para ashtu edhe gjatë procesit gjyqësor, është e pajustifikuar.
Duke u ndalur te roli i ish-presidentit Hashim Thaçi, Serwer theksoi se ai nuk ka pasur autoritet komandues mbi UÇK-në. Profesori sqaroi se këtë vlerësim e bazon edhe në njohjen e tij personale me Thaçin, me të cilin është takuar menjëherë pas luftës. Ai deklaroi se mbajtja përgjegjës e Thaçit mbi këtë bazë do të përbënte një gabim të rëndë.
I pyetur nëse pret lirimin e të akuzuarve, Serwer u përgjigj se nuk pret asgjë, por shtoi se çdo vendim i gjykatës duhet të respektohet, pavarësisht nëse ai e konsideron atë të justifikuar apo jo. Dhomat e Specializuara dhe Zyra e Prokurorit të Specializuar u themeluan në vitin 2015 nga Kuvendi i Kosovës dhe janë pjesë e sistemit gjyqësor të vendit, ndonëse veprojnë me personel ndërkombëtar.