Dineke de Groot, kryetarja e Gjykatës Supreme të Holandës, tha se vendimi i Dhomave të Specializuara të Kosovës në Hagë ndaj ish-udhëheqësve të Ushtrisë Çlirimtare të Kosovës duhet të trajtohet përmes mekanizmave që ofron sistemi ligjor. Në një prononcim për KosovaPress-in, ajo tha se është në dijeni të aktgjykimit dhe ndikimit të tij në Kosovë, por se nuk i takon të komentojë përmbajtjen e vendimit.
De Groot tha se brenda sistemit ka mundësi për të reflektuar mbi vendimin dhe se kjo duhet bërë në mënyrë që t’i shërbejë sundimit të ligjit. Sipas saj, kur një vendim gjyqësor konsiderohet i padrejtë, kundërshtimi duhet të shprehet dhe të ndiqen rrugët ligjore.
Më 16 shtator 2026, Dhomat e Specializuara shpallën fajtorë për krime lufte katër ish-udhëheqës të Ushtrisë Çlirimtare të Kosovës. Sipas vendimit të shkallës së parë, ish-presidenti Hashim Thaçi dhe ish-kryetari i Kuvendit Jakup Krasniqi u dënuan me nga 25 vjet burgim. Ish-kryetari i Kuvendit Kadri Veseli u dënua me 18 vjet, ndërsa Rexhep Selimi me 13 vjet burgim.
Trupi gjykues i shpalli fajtorë për ndalim të paligjshëm ose arbitrar, trajtim mizor, torturë dhe vrasje të paligjshme. Në të njëjtën kohë, të katër të akuzuarit u shpallën të pafajshëm për krime kundër njerëzimit. Trupi gjykues konstatoi se Prokuroria nuk kishte provuar përtej dyshimit të arsyeshëm se kishte ndodhur një sulm i gjerë ose sistematik kundër popullsisë civile.
Aktgjykimi nuk është i formës së prerë dhe mund t’i nënshtrohet shqyrtimit në procedurën e apelit. Ish-krerët e UÇK-së i kanë mohuar akuzat gjatë procesit gjyqësor, ndërsa ekipet e tyre mbrojtëse kanë kundërshtuar përfundimet e trupit gjykues.