Një proces debati ka përfshirë Kuvendin e Shqipërisë lidhur me ratifikimin e marrëveshjes financiare prej 302 milionë dollarësh me SHBA-të. Sipas të dhënave zyrtare, procesi i votimit është shoqëruar me pikëpyetje mbi transparencën, pasi një numër i kufizuar deputetësh kanë pasur akses në përmbajtjen e dokumentit përpara seancës plenare.
Nga 140 deputetë gjithsej në Kuvend, vetëm 27 prej tyre kanë nënshkruar deklaratën e konfidencialitetit për t'u konsultuar me marrëveshjen. Midis këtyre të fundit, 8 deputetë të opozitës, anëtarë të Komisionit të Sigurisë dhe Ekonomisë, nuk morën pjesë në votimin final në seancë plenare. Ata e kanë kundërshtuar zhvillimin e seancës brenda së njëjtës ditë, duke e cilësuar atë si një veprim antikushtetues.
Për pasojë, nga 74 deputetët që votuan pro ratifikimit të marrëveshjes, vetëm 19 prej tyre rezultojnë se kanë pasur akses paraprak në dokumentacionin e saj. Deputetët që kanë firmosur deklaratën e konfidencialitetit dhe kanë votuar në seancë janë:
• Besnik Brahimi
• Agron Malaj
• Lindita Nikolli
• Hysen Buzali
• Igli Hasani
• Elisa Spiropali
• Bujar Rexha
• Ilirjan Pendavinji
• Shkurt Lasku
• Termet Peci
• Ardit Bido
• Erjo Mile
• Zamira Sinaj
• Briseida Cakërri
• Aulona Bylykbashi
• Adi Qose
• Milva Ikonomi
• Elton Korreshi
• Admir Kadeli
Ndërkohë, përfaqësuesit e mazhorancës kanë mbrojtur procedurën e ndjekur, duke argumentuar se shqyrtimi i dokumentit është kryer në përputhje me rregullat e vendosura dhe se kufizimi i aksesit ka qenë i diktuar nga natyra konfidenciale e marrëveshjes financiare.
Përditësime
Partia Demokratike ka dërguar në Gjykatën Kushtetuese marrëveshjen e huasë prej 302 milionë dollarësh për blerjen e pajisjeve ushtarake. Opozita pretendon se janë shkelur shtatë nene të Kushtetutës dhe legjislacioni në fuqi. Procedura e miratimit u krye më 27 korrik, në një seancë me dyer të mbyllura të kërkuar nga 40 deputetë të Partisë Socialiste.