Gjatë diskutimeve në Kuvend mbi projektligjin për ndryshimin e ligjit “Për mbrojtjen e tokës bujqësore”, deputeti Erion Braçe kërkoi vendosjen e kritereve të sakta ligjore për instalimin e parqeve energjetike. Ai theksoi se kufijtë e këtyre zhvillimeve nuk duhet të mbeten në dorë të vendimeve të Këshillit të Ministrave, duke kërkuar të dhëna konkrete mbi licencat e miratuara për parqe eolike dhe agro-fotovoltaike në toka me bonitet të lartë, nga 9 në 10.
“Mbase nuk është ministri i Bujqësisë personi i duhur për t’iu përgjigjur, por pyetja është sa licenca janë dhënë deri më tani për parqe eolike dhe agro-fotovoltaike në toka bujqësore?”, u shpreh Braçe.
Në përgjigje të këtyre shqetësimeve, ministri i Bujqësisë, Andis Salla, u shpreh se ndryshimet ligjore nuk cënojnë funksionin primar të tokës, i cili mbetet prodhimi bujqësor. Sipas Sallës, projektligji përfaqëson një ndërhyrje të kufizuar për të integruar teknologji moderne, të cilat do të mundësojnë një menaxhim më efikas të ujit, lëndëve ushqyese dhe burimeve natyrore.
Ministri nënvizoi se fokusi i ri i bujqësisë duhet të zhvendoset nga thjesht shtimi i sipërfaqeve të kultivuara te rritja e produktivitetit për njësi. Sipas tij, teknologjia duhet të shërbejë si mjet për zhvillimin ekonomik dhe të ardhmen e brezave, pa cënuar qëllimin kryesor të tokës bujqësore.