Ky artikull është përditësuar. Shiko përditësimet
Reshje të dendura dëbore dhe ngrica kanë shkaktuar probleme në qarkullimin rrugor në zonat malore të Elbasanit mbrëmjen e së enjtes. Një automjet me tre persona mbeti i bllokuar në fshatin Shmil, pjesë e Njësisë Administrative Labinot, pasi rruga u bë e pakalueshme për shkak të borës dhe akullit.
Personat e izoluar kërkuan ndihmë, por ndërhyrja e shërbimeve rezultoi e vështirë për shkak të terrenit të thyer dhe kushteve atmosferike të pafavorshme.
Në fshatin turistik Gjinar të bashkisë Elbasan, disa automjete u bllokuan në akset rrugore malore. ARRSH po ndërhyn duke ndihmuar në qarkullimin e tyre.
Sipas informacioneve, shumica e qytetarëve të bllokuar ishin nga qyteti i Elbasanit dhe kishin udhëtuar drejt këtyre zonave për turizëm dimëror. Ata injoruan thirrjet e vazhdueshme të autoriteteve për përdorimin e zinxhirëve dhe pajisjeve dimërore, çka bëri mjetet pa këto pajisje shkak kryesor të bllokimit dhe vështirësoi ndërhyrjen e emergjencave.
Autoritetet u bëjnë apel qytetarëve të shmangin lëvizjet e panevojshme drejt zonave malore gjatë kushteve të motit ekstrem dhe të respektojnë rregullat e qarkullimit rrugor për të garantuar sigurinë.
Përditësim
Rrëshqitje masive shkëmbore ka ndodhur sot paradite, rreth orës 10:00, në rrugën Elbasan–Gjinar pranë fshatit Lleshan, për shkak të reshjeve të shiut. Autoritetet kanë hapur një korsi për të rikthyer qarkullimin, por bllokimi ndikon lidhjen kryesore të fshatrave të zonës së Shpatit me Elbasanin.
Përditësim
Rruga Elbasan-Gjinar pranë Lleshanit është rikthyer plotësisht në normalitet pas katër orësh punimesh nga ASHP dhe ARRSH. Bllokimi fillestar zgjati rreth një orë për shkak të rrëshqitjes së dherave nga reshjet e shiut, jo rrëshqitjes shkëmbore siç raportohet në titullin origjinal. Autoritetet paralajmërojnë rrezik të vazhdueshëm për shkak të reshjeve intensive.