Kuvendi i Shqipërisë miratoi dhe Presidenti i Republikës, Bajram Begaj, dekretoi ligjin e ri "Për parandalimin e konfliktit të interesit".
Ligji hyn në fuqi 6 muaj pas botimit në Fletoren Zyrtare. Ai vendos kufizime për zyrtarët e lartë dhe gjoba deri në 500 mijë lekë për fshehjen e pasurisë apo interesave private.
Kufizimet për zyrtarët dhe familjarët
Rregullat zbatohen te zyrtarët në funksione të larta kushtetuese, anëtarët e qeverisë, deputetët dhe kryebashkiakët, si dhe familjarët e tyre:
- Ndalim i zotërimit të aksioneve apo ushtrimit të aktiviteteve biznesi që përfitojnë nga pasuria e shtetit.
- Ndalim i pranimit të dhuratave, favoreve apo trajtimeve preferenciale; vlera maksimale e lejuar për dhurata simbolike është 10 000 lekë. Dhuratat mbi këtë vlerë refuzohen ose raportohen.
- Ish-zyrtarët nuk mund të punësohen në pozicione drejtuese në kompani private me lidhje me institucionin e mëparshëm për 2 vjet pas mandatit.
Kufizimet për krerët e drejtësisë
Rregullat vlejnë po ashtu për anëtarët e Gjykatës Kushtetuese, Këshillit të Lartë Gjyqësor (KLGJ), Këshillit të Lartë të Prokurorisë (KLP), Inspektorin e Lartë të Drejtësisë dhe Prokurorin e Përgjithshëm.
Neni 35 ndalon këta zyrtarë, si dhe kompanitë ku ata mund të kenë interesa pasive, të kryejnë veprimtari fitimprurëse që buron nga pasuria e shtetit ose të fitojnë pasuri brenda juridiksionit të tyre.
Përditësime
Ligji për konfliktin e interesit vendos kufizime të reja për magjistratët:
- Gjyqtarët dhe prokurorët ndalohen të punojnë si avokatë, noterë, ekspertë të licencuar, konsulentë ose arbitra në arbitrazhe tregtare (përjashtim: mësimdhënie dhe kërkime shkencore).
- Kufizimet vlejnë menjëherë edhe për magjistratët e sapo diplomuar.
- Magjistratët ndalohen të jenë anëtarë ose funksionarë të partive politike, të lidhen publikisht me to, si dhe të drejtojnë ose pjesëmarrin në organet e OJF-ve.
Gjobat fiksohen në 200 000–500 000 lekë.
Gjyqtarët dhe prokurorët ndalohen të administrojnë kompani, të ushtrojnë aktivitete tregtare ose të zotërojnë aksione që krijojnë konflikt interesi. Zbatimi monitorohet nga Inspektorati i Lartë, me gjoba deri në 500 mijë lekë.