Një delegacion i Grupit të Bashkuar të Mbështetjes Logjistike të KFOR-it (Joint Logistic Support Group – JLSG) realizoi më 24 janar 2026 një vizitë zyrtare në Portin e Durrësit. Delegacioni u prit në takim nga Drejtori Ekzekutiv i Autoritetit Portual Durrës, Liburn Aliu.
Vizita u zhvillua në kuadër të forcimit të bashkëpunimit ndërmjet institucioneve shqiptare dhe forcave aleate të NATO-s. Qëllimi kryesor ishte njohja nga afër me kapacitetet infrastrukturore dhe logjistike të portit për mbështetjen e operacioneve logjistike dhe ushtarake.
Përfaqësuesit e KFOR-it, të përbërë nga nivele të ndryshme drejtuese dhe operative, u informuan mbi potencialin operacional të portit, zonat e shërbimit dhe mundësitë që Shqipëria ofron si vend pritës për operacione të mbështetura nga KFOR-i.
Takimi shërbeu për shkëmbimin e informacioneve mbi nevojat logjistike, planifikimin operacional dhe rolin strategjik të Portit të Durrësit në rajon. Kjo vizitë vlerësohet si hap i rëndësishëm drejt thellimit të bashkëpunimit institucional dhe forcimit të rolit të Shqipërisë në misione ndërkombëtare të sigurisë.