Një hetim i përbashkët nga BBC Panorama dhe Byroja e Gazetarisë Investigative ka ngritur dyshime për përfshirjen e firmës së kontabilitetit Deloitte në skema të falsifikimit të dokumenteve financiare. Sipas të dhënave, këto veprime janë ndërmarrë për të fshehur pasurinë e oligarkut rus Roman Abramovich dhe për të shmangur detyrimet tatimore në Qipro.
Dokumentet e rrjedhura, që mbulojnë periudhën 1995-2022, tregojnë se Deloitte në Qipro ka nënshkruar llogari që rezultuan në zhdukjen e aseteve luksoze, si jahte, vila, avionë privatë dhe helikopterë, me vlerë 672 milionë dollarë nga bilanci i kompanisë Amiscan Investments. Pas ndryshimeve në dokumentacion në vitin 2006, asetet e deklaruara zbritën në rreth 75 mijë dollarë.
Skema dyshohet se ka përfshirë edhe kompanitë Kravin Investments dhe Electus Investments. Në rastin e parë, pas konsultimeve me Deloitte, u propozua ndryshimi i pasqyrave financiare për të fshehur të ardhurat nga interesat bankare, ndërsa në rastin e dytë, dokumente me data të prapambetura u përdorën për të rialokuar pasuri me vlerë mbi 10 miliardë dollarë te një kompani e regjistruar në Ishujt e Virgjër Britanikë.
Eksperti i ligjit financiar, Andrew Mitchell KC, e përshkroi skemën si evazion fiskal "të drejtpërdrejtë". Ndërkohë, deputeti qipriot Christos Christofides bëri thirrje për hetimin e mundësive të rikuperimit të taksave.
Roman Abramovich dhe Deloitte i kanë mohuar këto pretendime. Avokatët e oligarkut argumentuan se ai nuk ishte i përfshirë në menaxhimin e përditshëm të kompanive dhe se nuk ekzistojnë prova që ai ka urdhëruar ose ka qenë në dijeni për falsifikimet. Deloitte Cyprus deklaroi se vepron në përputhje me ligjet në fuqi, duke shtuar se nuk mund të komentojë mbi ngjarje të ndodhura më shumë se dy dekada më parë. Aktualisht, rreth 5.4 miliardë paund të aseteve të Abramovich mbeten të ngrira në Jersey në kuadër të një hetimi penal disavjeçar.