Roman Abramovich, oligarku rus dhe ish-pronar i klubit Chelsea, ka mohuar përmes një përfaqësuesi lidhjen me hetimet që autoritetet gjermane po zhvillojnë në zyrat e Deutsche Bank.
Sipas deklaratës, Prokuroria e Frankfurtit, e cila po kryen hetimet në bankë, ka konfirmuar se Abramovich nuk është i dyshuar dhe nuk është ngritur ndaj tij asnjë akuzë. “Prokuroria e Frankfurtit ka konfirmuar se Abramovich nuk është i dyshuar në këtë çështje dhe se ndaj tij nuk ka akuza”, thuhet në deklaratë.
Janë nisur procedura ligjore ndaj disa publikimesh që e kanë lidhur në mënyrë të pabazuar emrin e biznesmenit me hetimin. Këto raportime bazoheshin në informacione të rreme nga një media gjermane. Disa media kanë ndryshuar tashmë artikujt e tyre duke hequr emrin e Abramovich, ndërsa pritet që të tjerat të bëjnë të njëjtën.
Në një deklaratë të mëparshme, përfaqësuesi kishte theksuar se Abramovich nuk kishte dijeni për hetimet dhe ka vepruar gjithmonë sipas ligjit.
Çështja u ngrit pas një raporti të revistës Der Spiegel, e cila shkroi se hetimet lidhen me marrëdhëniet e biznesit të Deutsche Bank me kompani të kontrolluara nga Abramovich.