Besart Xhaferri, deputet i Partisë Demokratike, ka marrë pjesë në protestën kombëtare të Adriatik Lapajt këtë mbrëmje në Bulevardin “Dëshmorët e Kombit”, para Kryeministrisë në Tiranë.
Kjo është protesta e katërt kombëtare e Lëvizjes “Shqipëria Bëhet” para Kryeministrisë. Adriatik Lapaj po qëndron aty pandërprerë prej afro dy muajsh. Protesta kërkon dorëheqjen e kryeministrit Edi Rama dhe qeverisjen e vendit nga një qeveri tranzitore deri në mbajtjen e zgjedhjeve.
Protestuesit kundërshtojnë qeverinë dhe skandalet që përfshijnë zëvendëskryeministren dhe ministrën e Infrastrukturës Belinda Balluku. Besart Xhaferri shfaqet mes protestuesve, siç dëshmojnë fotot e publikuara.
Më parë, Adriatik Lapaj ka refuzuar ftesën e kryetarit të Partisë Demokratike Sali Berisha për t’u bashkuar në një front opozitar kundër qeverisë.
Përditësime
Ermal Hasimja u bashkua protestës së Adriatik Lapajt para Kryeministrisë.
Adriatik Lapajt deklaroi për bashkim opozitar të gjerë përtej kryetarëve të partive, reformim total të sistemit elektoral, distancim nga marrëveshja për Kodin Zgjedhor dhe një Kod të ri ku vota vlen njësoj në të gjithë vendin.