Grupi i udhëhequr nga Adriatik Lapaj, kryetar i lëvizjes Shqipëria Bëhet, ka zhvendosur vendndodhjen e protestës së tij të vazhdueshme para Kryeministrisë në Tiranë, më 20 shkurt 2026. Protestuesit, që qëndrojnë aty 24 orë që nga 8 dhjetori 2025, janë spostuar në krahun tjetër të bulevardit Dëshmorët e Kombit, duke i liruar hapësirën Partisë Demokratike për tubimin e thirrur nga Sali Berisha.
Kjo zhvendosje përsëritet në rastet e protestave kombëtare të PD-së. Adriatik Lapaj ka refuzuar sërish ftesën për t’u bashkuar me protestën e katërt kombëtare të Partisë Demokratike kundër Edi Ramës. Sali Berisha ka ftuar disa herë Lapajn dhe përfaqësues të tjerë opozitarë për bashkëpunim në tryezë dhe në protestë, por ata nuk e kanë pranuar.
Ndërkaq, ish-deputeti Ervin Salianji i është bashkuar tubimit të PD-së para Kryeministrisë, së bashku me mbështetësit e tij në rrugën drejt ndryshimeve në parti.