Deputeti i Partisë Demokratike, Tritan Shehu, ka akuzuar qeverinë shqiptare se nuk ka ndërmarrë veprime për riatdhesimin e qytetarëve shqiptarë të mbetur në Lindjen e Mesme, ku tensionet janë përshkallëzuar pas sulmit në Iran.
Në një reagim në rrjetet sociale, ai shkruan se qeveria i ka braktisur këta qytetarë në mes të luftës dhe se nuk ka asnjë mbështetje drejtpërdrejtë nga shteti shqiptar.
Sipas tij, informacionet indirekte tregojnë se në zonë ndodhen mbi 3 mijë shqiptarë: rreth 2000 janë rezidentë për studime, aktivitete profesionale e të ngjashme, ndërsa rreth 1000 janë turistë, duke përfshirë burra, gra, fëmijë dhe familje të tëra në vështirësi.
Shehu thekson mungesën e kontaktit me shumicën e tyre, mungesën e databazës zyrtare, të komunikimit me familjarët dhe të strukturave ndërinstitucionale.
Ai shton se qeveria nuk informon opinionin publik dhe se maxhoranca nuk pranoi diskutimin e çështjes në Komisionin e Jashtëm, pavarësisht kërkesës së tij.
Shehu pretendon se qeveria shqiptare është e vetmja në Europë që lë qytetarët e saj pa mbështetje në këtë situatë.
Për zgjidhjen e problemit, ai kërkon masa të menjëhershme:
- nxjerrjen e një urdhri për riatdhesimin e shqiptarëve;
- aktivizimin e unitetit të krizave pranë Ministrisë së Jashtme si task force ndërinstitucionale;
- miratimin e fondeve përkatëse nga Këshilli i Ministrave për këto operacione.
Qeveria nuk ka dhënë ende përgjigje zyrtare ndaj këtyre akuzave.