Ministria për Evropën dhe Punët e Jashtme ka publikuar një njoftim të përditësuar më 3 mars 2026, sipas të cilit situata e sigurisë në Lindjen e Mesme mbetet e paqëndrueshme dhe e paparashikueshme për shkak të përshkallëzimit ushtarak në rajon.
Ministria këshillon fuqimisht shtetasit shqiptarë të shmangin çdo udhëtim drejt vendeve të rajonit deri në një njoftim të dytë. Autoritetet theksojnë se mbyllja e hapësirës ajrore në një perimetër më të gjerë sesa vendet e prekura deri tani mbetet mundësi reale dhe fluturimet mund të anulohen pa paralajmërim. Për çështjet e fluturimeve, qytetarët duhet të kontaktojnë drejtpërdrejt kompanitë ajrore përkatëse.
Për shtetasit shqiptarë që gjenden aktualisht në rajon, Ministria rekomandon:
- Të tregojnë vigjilencë maksimale dhe të shqyrtojnë me përparësi mundësinë e largimit përmes linjave ajrore, për aq kohë sa ato vijojnë të jenë funksionale;
- Të ndjekin zhvillimet përmes burimeve mediatike të besueshme dhe kanaleve zyrtare të informacionit;
- Të respektojnë udhëzimet e autoriteteve lokale;
- Të mbajnë gjithmonë të gatshme dokumentet e udhëtimit dhe mjetet e komunikimit;
- Në rast nevoje, të kontaktojnë përfaqësitë diplomatike dhe konsullore të Republikës së Shqipërisë në rajon dhe të veprojnë sipas udhëzimeve të tyre.
Autoritetet shqiptare janë në monitorim të vazhdueshëm të situatës dhe do të njoftojnë në kohë reale për çdo zhvillim të ri.