Ferit Hoxha, ministri i sapoemëruar për Evropën dhe Punët e Jashtme, drejtoi sot një takim të shtabit të posaçëm të ngritur në ministri, me ekipin drejtues dhe ambasadorët e Shqipërisë në vendet e Lindjes së Mesme.
Ky takim, në ditën e parë të detyrës së tij, u fokusua në përditësimin e situatës së sigurisë në rajon për shkak të përshkallëzimit ushtarak, si dhe në analizën e nevojave të qytetarëve shqiptarë rezidentë apo me qëndrim të përkohshëm atje.
Në një postim në rrjetin social X, Hoxha shkroi:
"Në ditën e parë të punës, dosja e parë në tavolinën time: përditësimi me situatën e sigurisë në vendet e Lindjes së Mesme, si pasojë e përshkallëzimit ushtarak në rajon, dhe në veçanti, analizimi i detajuar i problematikave dhe nevojave të qytetarëve shqiptarë, rezidentë apo me qëndrim të përkohshëm në këto vende.
Shtabi i posaçëm i ngritur në Ministrinë për Evropën dhe Punët e Jashtme, si dhe ekipi drejtues i institucionit, në koordinim të ngushtë me përfaqësitë tona diplomatike në rajon, të cilat i falënderoj për angazhimin dhe përkushtimin profesional, po ndjek në mënyrë të pandërprerë dhe me vëmendje maksimale çdo zhvillim, duke qenë në kontakt të drejtpërdrejtë me qytetarët tanë dhe pranë kujtdo që ka nevojë për informacion, këshillim dhe asistencë.
Strukturat e Shërbimit të Jashtëm, në bashkëpunim me institucionet e tjera, janë në gatishmëri të plotë për të marrë çdo masë të nevojshme në varësi të zhvillimeve në vendet e prekura dhe për t’iu përgjigjur përshtatshmërisht çdo situate. Siguria dhe mirëqenia e shtetasve tanë mbeten përparësi absolute."
Përditësime
Ferit Hoxha falënderoi Kryeministrin Edi Rama dhe Presidentin Bajram Begaj për besimin në emërimin e tij si ministër.
Hoxha theksoi përvojën e tij mbi tre dekada e gjysmë si nëpunës publik dhe anëtar i Shërbimit të Jashtëm, duke e cilësuar si nder të madh në një moment të rëndësishëm për vendin.