Në seancën gjyqësore të enjten ndaj ish-kryeshefit të Korporatës Energjetike të Kosovës (KEK), Nagip Krasniqi, i akuzuar për keqpërdorim të pozitës apo autoritetit zyrtar, doli si dëshmitare Arjeta Saraqi, aktualisht menaxhere për planifikim strategjik në KEK dhe ish-shefe e kabinetit të të akuzuarit.
Dëshmitarja deklaroi se e njihte Isuf Zejnën nga një rast kur i kishte dorëzuar një ftesë policore kryeshefit Krasniqi, i cili kishte përgatitur një autorizim për Zejnën që të përgjigjej ndaj shkresës policore. Ajo konfirmoi se kishte folur me të kur ky i fundit kishte qenë në zyrë.
Sa i përket angazhimit të një konsulenti ligjor në vitin 2023, Saraqi tha se kërkesa kishte ardhur nga vetë Nagip Krasniqi, i cili i kishte kërkuar të përgatisë formularët përkatës dhe t’i dorëzonte në zyrën e prokurimit. Vlera e paraparë e kontratës ishte rreth 60 mijë euro, sipas kujtesës së saj. Ajo theksoi se KEK ka zyrë ligjore, por nuk dinte saktësisht nga cili sektor duhej të niste një kërkesë e tillë.
Prokurorja Firkije Fejzullahu e pyeti dëshmitaren për aktivitetet e prokurimit lidhur me riparimin e kalldajës së Bllokut A5. Saraqi nuk përjashtoi mundësinë e pranishmërisë në diskutime të përgjithshme për këtë çështje.
Avokati i të akuzuarit, Vyrtyt Ibrahimaga, parashtroi pyetje për preferencat e klientit të tij. Saraqi deklaroi se Krasniqi nuk kishte preferenca për ndonjë operator të caktuar dhe respektonte parimet e KEK-ut: çmimi më i ulët, operatori serioz dhe kryerja brenda afatit, për shkak të pasojave në furnizimin me energji elektrike. Këto kritere i respektonin edhe drejtorët e tjerë, sipas saj.