Paneli gjyqësor i Dhomave të Specializuara të Kosovës në Hagë ka shtyrë për të paktën dy muaj shpalljen e aktgjykimit ndaj ish-krerëve të Ushtrisë Çlirimtare të Kosovës (UÇK), Hashim Thaçit, Kadri Veselit, Jakup Krasniqit dhe Rexhep Selimit. Gjyqi për krime lufte dhe krime kundër njerëzimit përfundoi në shkurt të këtij viti dhe vendimi pritej gjatë këtij muaji.
Zëdhënësja e Gjykatës Speciale, Angela Griep, konfirmoi për Radion Evropa e Lirë se paneli vendosi ta shtyjë shpalljen e aktgjykimit deri më 20 korrik, për shkak të kompleksitetit të rastit. Ajo sqaroi se kjo datë nuk është e shpalljes së aktgjykimit, por vetëm një afat i zgjatur. Nëse një zgjatje e mëtejshme do të jetë absolutisht e nevojshme, paneli do të lëshojë një urdhër përkatës në kohën e duhur.
Të katërtit kanë mohuar vazhdimisht akuzat dhe u shpallën të pafajshëm në deklaratat përmbyllëse të shkurtit. Prokurorët kërkojnë shpalljen e tyre fajtorë dhe dënim me nga 45 vjet burgim secili, ndërsa ekipet mbrojtëse kërkojnë lirimin e tyre për mungesë provash.
Gjyqi nisi në vitin 2023, ndërsa të akuzuarit janë në paraburgim në Hagë që nga viti 2020. Hashim Thaçi ishte udhëheqës politik i UÇK-së para dhe gjatë luftës së viteve 1998-1999, Kadri Veseli udhëheqës i shërbimit të inteligjencës, Jakup Krasniqi zëdhënës dhe Rexhep Selimi anëtar i shtabit të përgjithshëm.
Dhomat e Specializuara kanë selinë në Hagë të Holandës dhe përbëhen nga gjyqtarë e avokatë ndërkombëtarë. Gjykata u themelua nga Kuvendi i Kosovës në vitin 2015 për të gjykuar rastet kundër ish-pjesëtarëve të UÇK-së sipas ligjit të Kosovës.
Përditësime
Ekspertët e drejtësisë ndërkombëtare Mathias Holvoet dhe Iva Vukushiq shpjegojnë për Radion Evropa e Lirë arsyet specifike të shtyrjes dy-mujore të aktgjykimit.
Sipas Holvoet, shtyrja vjen nga numri i madh i të pandehurve, dhjetëra mijëra prova, dëshmitarët e shumtë dhe kompleksiteti juridik.
Vukushiq, historiane në Universitetin e Utrehtit me prejardhje kroate dhe përvojë në Tribunalin e Hagës, konfirmon të njëjtat sfida.