Paneli gjyqësor i Dhomave të Specializuara në Hagë vendosi të shtyjë për të paktën dy muaj shpalljen e aktgjykimit ndaj ish-krerëve të Ushtrisë Çlirimtare të Kosovës (UÇK), Hashim Thaçi, Kadri Veseli, Jakup Krasniqi dhe Rexhep Selimi. Procesi gjyqësor, i nisur para gjashtë vjetësh me arrestimin dhe paraburgimin e tyre, i akuzon për krime lufte dhe krime kundër njerëzimit.
Shpallja pritej në mes të këtij muaji, rreth tre muaj pas përfundimit të gjyqit në shkurt. Gjykata, e cila formalisht është pjesë e sistemit gjyqësor të Kosovës, por përbëhet nga gjyqtarë dhe prokurorë ndërkombëtarë, arsyetoi shtyrjen përtej 20 korrikut me kompleksitetin e rastit, pa dhënë detaje të mëtejshme.
Në Kosovë, disa qytetarë shprehin pakënaqësi, duke e cilësuar shtyrjen si zvarritje të panevojshme që zbeh besimin në drejtësi.
Kompleksiteti i çështjes
Ekspertët e drejtësisë ndërkombëtare Mathias Holvoet dhe Iva Vukushiq thonë se shtyrja është e zakonshme për raste të tilla. Vukushiq, historiania nga Universiteti i Utrehtit në Holandë dhe njohëse e proceseve gjyqësore për krimet në ish-Jugosllavi, thekson faktorë si numri i të pandehurve, volumi i provave që arrin në dhjetëra mijëra faqe dhe numri i lartë i dëshmitarëve. Me prejardhje nga Kroacia dhe njohuritë e saj për Tribunalin e Hagës, ajo shton se argumentet juridike të ndërlikuara kërkojnë hulumtim të thellë dhe diskutime të gjata mes hartuesve të aktgjykimit.