Zëdhënësja e Dhomave të Specializuara të Kosovës me seli në Hagë, Angela Griep, ka publikuar një videoadresim në platformën "X" për të sqaruar kufijtë e juridiksionit të këtij institucioni. Ajo theksoi se gjykata nuk gëzon mandat ekskluziv për të shqyrtuar çdo krim të kryer gjatë luftës në Kosovë.
Sipas Griep, një pjesë e krimeve të luftës janë gjykuar në të kaluarën nga Tribunali Ndërkombëtar për ish-Jugosllavinë, ndërsa raste të tjera janë trajtuar nga gjykata të ndryshme vendore dhe ndërkombëtare. Institucioni vepron mbi bazën e një mandati të posaçëm, të përcaktuar nga institucionet e Kosovës në bashkëpunim me Bashkimin Evropian.
Lidhur me procedurat gjyqësore, zëdhënësja siguroi se për çdo akuzë që konfirmohet, gjykata garanton një proces të drejtë, të paanshëm dhe të pavarur. Ajo shtoi se ky proces mbron të drejtat e të akuzuarve, siguron mbrojtjen e dëshmitarëve dhe u mundëson viktimave të thonë fjalën e tyre në procesin e drejtësisë.