Shefi i Krimeve në Komisariatin e Sarandës, Mateo Bakalli, është përfshirë në një incident fizik në orët e para të ditës së sotme, më 16 gusht. Ngjarja ka ndodhur në rrugën Butrinti, ku zyrtari i policisë ka ndërhyrë për të neutralizuar një konflikt që po zhvillohej mes disa personave.
Sipas dëshmisë së Bakallit, ai është prezantuar si punonjës policie gjatë ndërhyrjes për të shpëtuar qytetarët që po dhunoheshin, por është goditur me grushte nga autorët. Si pasojë e këtij sulmi, Bakalli ka pësuar lëndime në trup dhe hematoma në fytyrë, veçanërisht në zonën e syrit. Ai është paraqitur në spital për të marrë mjekimin e nevojshëm dhe pas trajtimit mjekësor e ka lënë ambientin spitalor.
Autoritetet policore kanë reaguar menjëherë pas ngjarjes duke shoqëruar rreth 15 persona në Komisariatin e Sarandës. Grupi hetimor është duke punuar për të dokumentuar provat dhe për të identifikuar përgjegjësit kryesorë të dhunës ndaj zyrtarit të policisë. Deri në këto momente, hetimet janë në fazën e zbardhjes së motiveve të sakta të kësaj përplasjeje.
Përditësime
Hetimet për dhunimin e shefit të Krimeve në Sarandë, Mateo Bakalli, janë përqendruar te klubi 'Orange', ku dyshohet se ndodhi konflikti. Burime policore bëjnë me dije se në përplasje janë përfshirë edhe truproja të lokalit. Ndërkohë, grupi hetimor po verifikon një denoncim të pakonfirmuar, sipas të cilit shkaku i sherrit ka qenë ngacmimi i një vajze nga oficeri i policisë.
Policia e Shtetit konfirmoi se njësia 'Shqiponja' ndërhyri për të stabilizuar situatën pas thirrjes për ndihmë nga shefi i Krimeve, Mateo Bakalli. Hetimet e deritanishme dhe pamjet filmike dokumentojnë se oficeri Bakalli kishte ndërhyrë fillimisht për të shuar një konflikt fizik mes dy rojeve të lokalit dhe disa qytetarëve. Autoritetet kanë sekuestruar provat video, të cilat pritet të hedhin dritë mbi dinamikën e ngjarjes.