Një grup i gjerë qytetarësh shqiptarë në Mbretërinë e Bashkuar u tubuan në Londër për të protestuar kundër qeverisë shqiptare dhe projektit zhvillimor në zonën e mbrojtur të Zvërnecit.
Pjesëmarrësit, të pajisur me flamuj kombëtarë, shprehën pakënaqësinë ndaj politikave të kryeministrit Edi Rama. Në pankartat e tyre dominuan mesazhet si “Shqipëria nuk shitet”, si dhe thirrje për dorëheqjen e qeverisë. Një pjesë e protestuesve artikuluan edhe kërkesa për përgjegjësi ligjore, duke përfshirë thirrje si “Rama në burg, Berisha në burg”.
Tubimi në kryeqytetin britanik u zhvillua në mënyrë paqësore. Kjo protestë është pjesë e një vale më të gjerë të diasporës shqiptare, e cila ka organizuar tubime të ngjashme gjatë ditëve të fundit edhe në qendra të tjera të rëndësishme europiane, përfshirë Milano, Firence, Berlin dhe Mynih.