Gjykata Themelore në Prizren ka shqiptuar aktgjykim më 7 prill ndaj Dibran Hoxhës, të njohur si Kobra, Arlind Dakajt dhe Mirsat Hajredinit për kryerjen e veprës penale të lëndimit të rëndë trupor.
Gjykatësja Vjollca Buzhala vendosi dënim me 6 muaj burgim për secilin, i cili u zëvendësua me 5 mijë euro gjobë me kërkesë të avokatëve mbrojtës Avni Berisha, Driton Shehu dhe Klodian Krasniqi, në bazë të nenit 44 të Kodit të Procedurës Penale të Kosovës. Gjoba paguhet brenda 15 ditësh pas plotfuqishmërisë së aktgjykimit.
Dënimi bazohet në nenin 186, paragrafi 3, nënparagrafi 3.1 të Kodit Penal të Kosovës, që parashikon burgim nga 1 deri në 8 vjet.
Sipas aktakuzës së Prokurorisë Themelore në Prizren, më 15 qershor 2018, të akuzuarit i shkaktuan lëndime të rënda trupore Hulusi Badallajt pas një mosmarrëveshjeje. Badallaj kishte shkuar në stacionin policor për të paraqitur rastin dhe, duke u kthyer, të njëjtët i kishin ndërprerë rrugën. Ata e sulmuan me grushta dhe mjete të forta, duke i shkaktuar tronditje në tru dhe 7 plagë në trup.
Të akuzuarit kanë qëndruar në paraburgim nga 19 qershori deri më 23 korrik 2018, prandaj gjoba efektive llogaritet në 4.260 euro për secilin.