Automjeti tip Ford Fiesta i gazetarit Sami Curri u përfshi nga flakët rreth orës 02:45 në lagjen e Re të Bulqizës, teksa ishte i parkuar pranë banesës së tij. Fqinjët e njoftuan gazetarin pasi konstatojnë zjarrin dhe shërbimi zjarrfikës ndërhyri, por nuk arriti ta shpëtojë automjetin, i cili u shkrumbua plotësisht.
Gazetari Sami Curri, me rreth 10 vjet përvojë në mbulimin e çështjeve publike, prokurimeve, pushtetit vendor dhe drejtësisë në qarkun Dibër, dyshon se ngjarja është e qëllimshme. Ai deklaroi se nuk ka konflikte personale dhe se veprimi synon të përcjellë një mesazh ndaj punës së tij. "Kjo është e qëllimshme për të më frikësuar, por gazetaria është mision publik dhe do të vazhdojë me çdo çmim", tha Curri, duke shtuar se nuk ka dyshime konkrete ndaj ndokujt.
Policia ka nisur hetimet për zbardhjen e rrethanave dhe ka shoqëruar disa persona të lidhur me çështjet e fundit të mbuluara nga gazetari. Nuk raportohet për dëme në automjetet përreth.