Përfaqësuesja e Ganës, e drejtuar nga trajneri Carlos Queiroz, zhvillon sonte ndeshjen vendimtare kundër Kroacisë në kuadër të Grupit L të Kupës së Botës 2026. Me 4 pikë pas dy ndeshjeve të para, ganezët kanë mundësi të mbyllin fazën e grupeve në vendin e parë, të dytë ose të tretë.
Skenari i kualifikimit si nënkampione e grupit paraqet një vështirësi logjistike për ekipin, pasi ndeshja e fazës së 1/16 së finales do të zhvillohej në Toronto, Kanada. Mesfushori Thomas Partey, lojtar i Villarrealit dhe një prej titullarëve kryesorë të skuadrës, nuk lejohet të hyjë në territorin kanadez për shkak të procesit gjyqësor që po zhvillohet ndaj tij në Mbretërinë e Bashkuar, ku akuzohet për përdhunim dhe sulm seksual gjatë periudhës kur ishte pjesë e Arsenalit.
Në ndeshjen kundër Anglisë, Partey u rikthye në formacion dhe ishte ndër lojtarët më të vlerësuar në fushë, i dyti pas portierit Asare. Mungesa e tij në një ndeshje me eliminim direkt vlerësohet si një disavantazh i madh për Ganën. Kjo situatë ka nxitur debate brenda kampit ganez, pasi kualifikimi si një nga skuadrat më të mira të vendeve të treta do të shmangte udhëtimin në Kanada dhe do t'i mundësonte skuadrës ta përdorte futbollistin në fazën tjetër të turneut.