Mesfushori ganez, Thomas Partey, nuk do të jetë i pranishëm në ndeshjen e parë të përfaqësueses së tij në Kupën e Botës, për shkak të pamundësisë për të hyrë në Kanada. Autoritetet kanadeze kanë refuzuar kërkesën për vizë të lojtarit 32-vjeçar, duke e penguar atë të udhëtojë nga kampi bazë i ekipit në Boston, SHBA, drejt vendit pritës për takimin kundër Panamasë më 18 qershor.
Sipas informacioneve, ky vendim lidhet me procedurat gjyqësore në të cilat është i përfshirë futbollisti. Partey përballet me disa akuza për përdhunim dhe sulm seksual të ngritura nga Policia Metropolitane në korrik të vitit 2025. Lojtari, ish-anëtar i Arsenalit dhe aktualisht pjesë e Villarrealit, është deklaruar i pafajshëm dhe ndodhet në pritje të vendimit përfundimtar të gjykatës.
FIFA ka konfirmuar zyrtarisht pamundësinë e pjesëmarrjes së lojtarit në këtë ndeshje. Institucioni i futbollit botëror ka sqaruar se nuk është i përfshirë në procedurat e imigracionit, duke theksuar se vendimi për hyrjen në shtetin pritës mbetet kompetencë ekskluzive e autoriteteve të Kanadasë.
Përditësime
Autoritetet amerikane kanë autorizuar hyrjen e Thomas Partey në SHBA, duke konfirmuar praninë e tij për ndeshjet kundër Anglisë më 23 qershor dhe Kroacisë më 27 qershor. Vendimi është marrë pas shqyrtimit individual, duke qenë se lojtari nuk është shpallur ende fajtor. Ndaj Partey rëndojnë 7 akuza për përdhunim dhe 1 për sulm seksual, të raportuara nga 4 gra gjatë periudhës 2020-2022. Ndërkohë, trajneri Carlos Queiroz ka mbështetur publikisht përfshirjen e tij në ekip, ndonëse futbollistit i mbetet e ndaluar hyrja në Kanada për Botërorin.
Qeveria e Ganës ka kundërshtuar vendimin e Kanadasë për ndalimin e hyrjes së futbollistit Thomas Partey në territorin e saj. Zyrtarët ganezë e cilësuan masën si të pajustifikuar, duke argumentuar se ajo mbështetet në pretendime të pakonfirmuara dhe mungesë të një vendimi gjyqësor përfundimtar.