Në ndeshjen e parë të turit të parë kualifikues të Ligës së Konferencës, Dinamo u mposht me rezultatin 0-1 nga skuadra kazake Astana. Takimi, i zhvilluar në stadiumin “Elbasan Arena”, u karakterizua nga një lojë e ekuilibruar, veçanërisht gjatë pjesës së parë.
Lojtarët e Dinamos, Berisha, Përndreca dhe Malomo, krijuan disa raste shënimi, ndërsa portieri Teqja kreu disa ndërhyrje vendimtare për të mbajtur portën të paprekur. Zhbllokimi i rezultatit erdhi në minutën e 69-të, kur Ramazan Karimov shënoi nga afër pas një asistimi nga Tomasov.
Pas pësimit të golit, trajneri Ilir Daja bëri ndryshime në formacion për të kërkuar barazimin, por pa arritur të ndryshojë rezultatin. Në minutat e fundit, Astana ishte pranë dyfishimit të epërsisë, por goditja e Basmanov u ndal nga traversa.
Fati i kualifikimit për në raundin e dytë do të vendoset në ndeshjen e kthimit, e cila është planifikuar të luhet më 16 korrik, në orën 17:00, në stadiumin “Astana Arena”.
Përditësime
Klubi ka zyrtarizuar ndryshimin e emrit në Dinamo City. Pas humbjes në përballjen e parë europiane kundër Astana, klubi ka përcjellë një mesazh motivues në rrjetet sociale, duke theksuar se 'Beteja vazhdon'.