Gjatë shqyrtimit të projektligjit për ratifikimin e Konventës së Këshillit të Evropës për Mbrojtjen e Profesionit të Avokatit në Komisionin për Çështjet Ligjore dhe Administratën Publike, ministri i Drejtësisë, Toni Gogu, theksoi se ratifikimi i këtij instrumenti garanton të drejtën e qytetarit për një mbrojtje efektive përballë pushtetit të shtetit. Ministri nënvizoi se një drejtësi e fortë kërkon që prokuroria, gjykata dhe mbrojtja të kenë hapësirat e tyre ligjore, duke sqaruar se fuqia e sistemit nuk duhet të ndërtohet në dëm të palëve procedurale.
Deputeti Arjan Ndoja kërkoi sqarime mbi përputhshmërinë e rregullores së brendshme të GJKKO-së me parimet e Konventës, duke ngritur shqetësimin se bojkotimi i proceseve gjyqësore nga avokatët po pengon respektimin e afateve të paraburgimit dhe të drejtave të të pandehurve. Ministri Gogu sqaroi se, pas ratifikimit, të gjitha institucionet do të kenë detyrimin të rishikojnë aktet e tyre në përputhje me standardet evropiane dhe mekanizmin monitorues GRAVO.
Në vijim të debateve, deputeti i Partisë Demokratike, Saimir Korreshi, propozoi trajtim të barabartë për avokatët dhe kërkoi ndryshime në procedurat e divorcit, duke sugjeruar heqjen e fazës së pajtimit. Ai gjithashtu propozoi vendosjen e kufizimeve kohore për mandatet në krye të Dhomës së Avokatisë.
Debatet u fokusuan edhe te roli i Kuvendit. Tedi Blushi akuzoi palët për heshtje ndaj konfliktit mes avokatisë dhe gjykatës, ndërsa kreu i Komisionit, Ulsi Manja, argumentoi se zgjidhja duhet të arrihet përmes dialogut të drejtpërdrejtë mes palëve, duke shtuar se Kuvendi nuk ka kompetencë të thërrasë drejtuesit e gjykatave për dëgjesa. Ministri Gogu mbështeti thirrjen për një dëgjesë publike me grupet e interesit për të adresuar të gjitha shqetësimet rreth aksesit në proceset gjyqësore.