Sfidat e pjesëmarrjes së grave në tregun e punës dhe në sektorin e bujqësisë ishin fokusi kryesor i tryezës së rrumbullakët të organizuar nga Instituti Riinvest, në cilësinë e sekretariatit të Forumit Ekonomik të Grave. Në këtë takim u diskutua nevoja për politika që adresojnë informalitetin e punës së grave, veçanërisht në zonat rurale, ku kontributi i tyre shpesh nuk njihet apo paguhet.
Ministrja e Industrisë, Ndërmarrësisë dhe Tregtisë, Mimoza Kusari-Lila, vuri në dukje se vetëm 35% e grave në moshë pune janë pjesë e fuqisë punëtore, ndërsa të dhënat e regjistrimit të popullsisë të vitit 2024 tregojnë një shkallë joaktiviteti prej 65%. Ministrja theksoi se qeveria ka mbështetur 176 biznese të drejtuara nga gratë, ku 55 prej tyre kanë përfituar për rritjen e kapaciteteve prodhuese, 60 për certifikimin e produkteve dhe 69 për digjitalizim.
Koordinatorja e Forumit Ekonomik të Grave, Saxhide Mustafa, shpjegoi se mungesa e infrastrukturës, siç janë shërbimet e kujdesit për fëmijët dhe të moshuarit, mbetet një pengesë thelbësore për zhvillimin e biznesit dhe pjesëmarrjen e grave në vendimmarrje. Ajo kërkoi masa afirmative për të garantuar qasje të barabartë në tokë dhe asete publike.
Përfaqësues të organizatave ndërkombëtare, si Adnan Ahmeti nga Agjencia Austriake për Zhvillim (ADA) dhe Astrid Wein nga Caritas Zviceran, theksuan se mbështetja nuk duhet të jetë vetëm financiare. Sipas tyre, është jetike që gratë të kenë qasje në tregje, transport të besueshëm rural dhe shërbime këshilluese, për të siguruar pavarësi ekonomike dhe punësim të dinjitetshëm.