Ministria e Mjedisit, Planifikimit Hapësinor dhe Infrastrukturës të Kosovës dhe Ambasada e Zvicrës, përmes Programit IWRM-K, shënuan Ditën Botërore të Ujit 2026. Aktiviteti u zhvillua në kuadër të temës globale të OKB-së: "Aty ku rrjedh uji, rritet barazia", duke vendosur gratë dhe vajzat në qendër të diskutimeve mbi menaxhimin e qëndrueshëm të ujit.
Ngjarja mblodhi përfaqësuese nga institucionet publike, organizatat joqeveritare, akademia dhe gra fermere nga e gjithë Kosova. Diskutimet u përqendruan në sfidat dhe mundësitë për qasje të barabartë në resurset ujore.
Në fjalën hyrëse, Fitore Pacolli Dalipi, ministrja e Mjedisit dhe Planifikimit Hapësinor, theksoi se qasja e drejtë dhe e barabartë në ujë është nevojë njerëzore, çështje drejtësie sociale dhe zhvillim i qëndrueshëm. Ajo vuri në dukje se përfshirja e grave dhe vajzave në vendimmarrje dhe praktikat e menaxhimit të ujit kontribuon në ruajtjen e resurseve natyrore dhe zhvillimin ekonomik të familjeve e komuniteteve. Ministrja rikujtoi angazhimin e Kosovës ndaj Objektivit të Zhvillimit të Qëndrueshëm 6 për sigurinë e ujit dhe trajtimin e ujërave të ndotura deri në vitin 2030, si dhe bëri thirrje për politika që fuqizojnë gratë si aktorë kryesorë në këtë fushë.
Beate K. Elsasser, shefe e Bashkëpunimit në Ambasadën e Zvicrës në Kosovë, riafirmoi mbështetjen e vazhdueshme për iniciativa që lidhin menaxhimin e qëndrueshëm të ujit me barazinë gjinore dhe zhvillimin rural. Ajo e cilësoi ujin si burimin më të çmueshëm natyror dhe qasjen në të si të drejtë themelore.