Një autobus me udhëtarë u përfshi nga flakët mbrëmë rreth orës 18:25 në qendër të Kerzers në kantonin Fribourg të Zvicrës. Mediat zvicerane raportojnë se ngjarja ka lënë gjashtë viktima dhe disa të lënduar, prej të cilëve tre janë në gjendje të rëndë sipas të dhënave paraprake.
Autoritetet po hetojnë shkaqet, duke mos përjashtuar mundësinë e një akti të qëllimshëm. Sipas mediave zvicerane, një person ka lyer veten me benzinë brenda autobusit dhe ka vënë flakën, duke shkaktuar dëme të mëdha. Autobusi është bërë shkrumb e hi, siç tregojnë fotot e publikuara nga gazeta Blick.
Në videot që qarkullojnë në rrjete sociale, ku shihen flakët e mëdha, dëgjohen britma dhe biseda në gjuhën shqipe. "O nuk e di bre, po thonë se një njeri e ka kallë veten", dëgjohet një dëshmitar pak metra larg vendit të ngjarjes.
Ambasadori i Kosovës në Zvicër, Mentor Latifi, deklaroi se ambasada nuk ka ende asnjë informacion nëse midis viktimave ose të lënduarve ka shqiptarë ose kosovarë. "Nuk kemi ende asnjë informacion. Policia nuk i ka identifikuar viktimat", u shpreh ai për IndeksOnline. Ambasada e Kosovës konfirmoi të njëjtën gjë edhe për Lajmi.net, duke theksuar mungesën e të dhënave zyrtare nga autoritetet zvicerane.
Përditësime
F. Morina, shqiptar nga Kosova, konfirmohet i lënduar lehtë në duar nga zjarri i autobusit në Zvicër. Vëllai i tij ka njoftuar se po trajtohet në spital.